संतवाङ्मय हे वैश्विक संदेश देणारे, साऱ्या विश्वाच्या भल्यासाठी प्रार्थना करणारे अक्षरवाङ्मय आहे. त्यामुळे त्याला भाषा, धर्म, जात, पंथ किंवा प्रांत अशा कोणत्याही बंधनांत बांधता येत नाही. याची प्रचीती येणारा उपक्रम सरहद म्युझिकने राबवला आहे. काश्मिरी युवती शमीमा अख्तर यांच्या आवाजात काही मराठी अभंगांचे व्हिडिओ सादर करण्यात आले असून, ते रसिकांना आवडत आहेत.
पुण्यातील संजय नहार यांनी स्थापन केलेली ‘सरहद’ ही संस्था काश्मीरसह भारताच्या विविध सीमावर्ती प्रदेशांमध्ये कार्य करते. या भागातील तरुणांना अधिकाधिक चांगल्या संधी उपलब्ध करून त्यांना समाजाच्या मुख्य प्रवाहात आणण्यासाठी ही संस्था धडपडते. या संस्थेच्या सरहद म्युझिक या उपक्रमांतर्गत काही मराठी अभंग तरुण काश्मिरी गायिका शमीमा अख्तरच्या आवाजात सादर करण्यात आले आहेत. मजहर सिद्दिकी या काश्मिरी तरुण संगीतकाराने त्याला संगीत दिले आहे. माझे माहेर पंढरी, मोगरा फुलला, वृक्षवल्ली आम्हा सोयरे, रुणुझुणु रुणुझुणु रे भ्रमरा या रचनांचे व्हिडिओ यू-ट्यूबवर प्रसिद्ध करण्यात आले असून, ते रसिकांना आवडत आहेत.
गेल्या वर्षी शमीमा अख्तरने सादर केलेले संत ज्ञानेश्वरांचे पसायदान प्रचंड लोकप्रिय ठरले होते. यंदा हे पसायदान प्रेमनाथ शाद यांनी काश्मिरी भाषेत अनुवादित केले असून, ते प्रांजली नेवासकरने सादर केले आहे. मजहर सिद्दिकी यांनीच त्यालाही संगीत दिले आहे. या उपक्रमातील काही व्हिडिओ येथे शेअर करत आहोत.
